img_2200_n

  • ୧୧ଟି ବିଭିନ୍ନ ସ୍ଥାନରେ ବ୍ୟାପକ ଆଲୋଚନା
  • ଯୋଗ ଦେଲେ ଦିଲ୍ଲୀ, ବିଭିନ୍ନ ରାଜ୍ୟର ବିଶେଷଜ୍ଞ
  • ଓଡିଶାର ସିଭିଲ ସୋସାଇଟି, ବ୍ୟୁରୋକ୍ରାଟ, କର୍ପୋରେଟ ଓ ଗଣମାଧ୍ୟମ ଗୋଟିଏ ମଂଚରେ

ଭୁବନେଶ୍ୱର,୨୦  ସେପ୍ଟେମ୍ବର ୨୦୧୬ (ଓଡ଼ିଶାଲାଇଭ୍‌ ବ୍ୟୁରୋ): ତଳ ସ୍ତରର ଲୋକଟି ପାଖରେ ବିକାଶ ପହଂଚି ନ  ପାରିଲେ ବିକାଶର କିଛି ମାନେ ନାହିଁ । ଓଡିଶାର ବିକାଶ ପାଇଁ କୃଷି, ଶିକ୍ଷା ଓ ସ୍ୱାସ୍ଥ୍ୟ ସେବା ଜରୁରୀ । ଜଳବାୟୁ ପରିବର୍ତ୍ତନ ପ୍ରଭାବକୁ ପାରିବାରିକ ସ୍ତରରେ ମୁକାବିଲା ପାଇଁ କୌଶଳ ଗ୍ରହଣ କରିବା ଆବଶ୍ୟକ । ମର୍ଯ୍ୟାଦା ଓ ସମ୍ମାନର ସହିତ ସ୍ଥାନାନ୍ତର ହେଉଥିବା ଶ୍ରମିକ ମାନଙ୍କ ଜୀବିକାକୁ ନିଶ୍ଚିତ କରାଯିବା ଆବଶ୍ୟକ । ସ୍ଥାନାନ୍ତରୀ ଶ୍ରମିକଙ୍କ ପାଇଁ ଭ୍ରାମ୍ୟମାଣ ସାଧାରଣ ବଂଟନ ବ୍ୟବସ୍ଥା, ପ୍ରାଥମିକ ଶିକ୍ଷା ଏବଂ ସମନ୍ୱିତ ଶିଶୁ ବିକାଶ ଯୋଜନାର ନିଶ୍ଚିତତା କରାଯିବା ଆବଶ୍ୟକ । ଦାନ ଅପେକ୍ଷା ଯୋଜନାର ସୁଫଳ ତାକୁ ସଶକ୍ତିକରଣ କରିଲେ ରାଜ୍ୟ ଆଗେଇ ପାରିବ ବୋଲି ଓଡିଶା ବିକାଶ କନକ୍ଲେଭର ପ୍ଲାନେରୀ ଅଧିବେଶନରେ ଯୋଗ ଦେଇ ବହୁ ବକ୍ତା କହିଛନ୍ତି ।

ବୁଧବାର ଓଡିଶା ବିକାଶ କନକ୍ଲେଭରେ ୧୧ଟି ପୃଥକ ପ୍ରସଙ୍ଗକୁ ନେଇ ସମାନ୍ତରାଳ ଅଧିବେଶନ ମାନ ଆୟୋଜିତ ହୋଇଥିଲା । ସ୍ଥାନୀୟ ଏକ ହୋଟଲ ପରିସରରେ ଡିଜାଷ୍ଟର ଆଣ୍ଡ କ୍ଲାଇମେଟ ଆକ୍ସନ ଶୀର୍ଷକ ଆଲୋଚନାରେ ଆରସିଡିସି କାର୍ଯ୍ୟ ନିର୍ବାହୀ ନିର୍ଦେଶକ କୈଳାଶ ଚନ୍ଦ୍ର ଦାସ ସ୍ୱାଗତ ଭାଷଣ ଦେଇଥିବା ବେଳେ ଆଇଏଜିର ଦେବବ୍ରତ ପାତ୍ର ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ର କମଲ କିଶୋର, ଆସାମ, ସିକିମ, ବିହାର ରାଜ୍ୟ ବିପର୍ଯ୍ୟୟ ପରିଚାଳନା କର୍ତୃପକ୍ଷ ପକ୍ଷରୁ ଭାସ୍କର ବରୁଆ, ଅନିଲ ସିହ୍ନା, ସ୍ୱତନ୍ତ୍ର ରିଲିଫକମିଶନର ପ୍ରଦୀପ୍ତ ମହାପାତ୍ର, ଅରବିନ୍ଦ ବେହେରା, ପ୍ରଫେସର ରାଧାମୋହନ, ଅମ୍ବିକା ନନ୍ଦ, ପ୍ରମୁଖ ପ୍ରାକୃତିକ ବିପର୍ଯ୍ୟୟର ଅତୀତ, ବର୍ତମାନ , ବିପଦ ସଂକୁଳତାର ବିଶ୍ଲେଷଣ, ରିଲିଫ ଓ ଉଦ୍ଧାର ନୀତି ସମ୍ପର୍କରେ ବିସ୍ତୃତ ଆଲୋକପାତ କରିଥିଲେ ।

ଆରଏମଏନଏଚ ପରିସରରେ ଜଳ, ପରିମଳ ଓ ପରିଛନ୍ନତା  ପ୍ରସଙ୍ଗରେ ପ୍ରଫୁଲ୍ଲ ସାହୁ  ଅଧ୍ୟକ୍ଷତା କରିଥିବା ବେଳେ ବାଟର ଏଡର ବିଶାଖା ଭଂଜ, ତପନ ପାଢୀ, ଅଭୟ ବିଶ୍ୱାଳ, ଦେବୀ ମିଶ୍ର, ଜୋ ମାଡିୟତ, ବିରୁପାକ୍ଷ ଶତପଥୀ, ମାନସ ରଥ, ମମତା ଦାସ ପ୍ରମୁଖ ଜଳ ପରିମଳ ଓ ପରିଛନ୍ନତା ବିକାଶର ଏକ ପ୍ରମୁଖ ଅଂଗ ବୋଲି ଦର୍ଶାଇଥିଲେ  ଓ ଜଳ ଉପରେ ଅଧିକାର ସଂକୁଚିତ ହେବା ପୂର୍ବରୁ ଏହାର ସୁରକ୍ଷା ଓ ସଂରକ୍ଷଣ ପାଇଁ ଦୃଷ୍ଟି ଦେବାକୁ କହିଥିଲେ ।

ଅନୁସୂଚିତ ଜାତି ଓ ଜନଜାତି ଗବେଷଣା ପ୍ରତିଷ୍ଠାନରେ ଆଦିବାସୀ ସଶକ୍ତିକରଣ ଓ ବିକାଶ, ହୋଟେଲ ସାଂଡି ଟାବାର ପରିସରରେ ସ୍ୱାସ୍ଥ୍ୟ, ଇଗ୍ନୋ ଆଂଚଳିକ କେନ୍ଦ୍ରରେ ବିଦ୍ୟାଳୟ ଶିକ୍ଷା ଓ ଗୁଣାତ୍ମକ ପାଠପଢା, ହୋଟେଲ ସୂର୍ଯ୍ୟାଂଶ ଠାରେ ଆର୍ଥିକ ଅନ୍ତର୍ଭୁକ୍ତିକରଣ, ଜାଭିୟର ଇନଷ୍ଟିଚ୍ୟୁଟ ଅଫ ମ୍ୟାନେଜମେଂଟ ପରିସରରେ ନିଯୁକ୍ତି, ସାମର୍ଥ ଓ ସ୍ଥାନାନ୍ତର,ସିବାଇଏସଡି ପରିସରରେ ଖାଦ୍ୟ ଓ ପୁଷ୍ଟି ନିରାପତା, ଏନସିଡିଏସ ପରିସରରେ ବୃଷ୍ଟି ପୁଷ୍ଟ କୃଷି, ମେ ଫେୟାର ଠାରେ ଚିରନ୍ତନ ବିକାଶ ଓ ସୁଶାସନ ଓ ଆର୍ଥିକ ପରିଚାଳନା ଥିମକୁ ନେଇ ଆଲୋଚନା କରାଯାଇଥିଲା । ଆଲୋଚକ ମାନେ ସାଂପ୍ରତିକ ସମୟରେ ଅଷ୍ଟମ ଶ୍ରେଣୀ ଛାତ୍ରଟିଏ ପଂଚମ ଶ୍ରେଣୀ ପାଠ ପଢି ପାରୁ ନାହିଁ । ଇଂଜିନିୟରିଂରେ ହଜାର- ହଜାର ସିଟ ଖାଲି ପଡୁଛି । ଓଡିଶାର ଯୁବକ ମାନଙ୍କର ସାମର୍ଥ ନ ଥିବା ଦର୍ଶାଇ କର୍ପୋରେଟ ନିଯୁକ୍ତି ଦେଉ ନାହିଁ। ନିୟମିତ ବ୍ୟବଧାନରେ ସଂଗଠିତ ହେଉଛି ବିପର୍ଯ୍ୟୟ । ପାରିବାରିକ ପ୍ରସ୍ତୁତି କୌଶଳ ଯୋଜନାରେ ରୂପାୟିତ ହେବା ଆବଶ୍ୟକତା ବୋଲି ଅଂଶଗ୍ରହଣକାରୀ ମାନେ ଦର୍ଶାଇଥିଲେ ।

ଅପରାହ୍ନରେ ଆରଏମଏନଏଚ ପରିସରରେ ଆୟୋଜିତ ପ୍ଲାନେରୀ ଅଧିବେଶନରେ ଅଗ୍ରଗାମୀର ମୁଖ୍ୟ ଅଚ୍ୟୁତ ଦାସ ଅଧ୍ୟକ୍ଷତା କରିଥିଲେ । ସମ୍ବାଦର ସମ୍ପାଦକ ସୌମ୍ୟ ରଂଜନ ପଟ୍ଟନାୟକ ଏଥିରେ ଯୋଗ ଦେଇ ରାଜ୍ୟର ସ୍ୱାସ୍ଥ୍ୟ ସୂଚକ ଦାନା ମାଝୀ, ଗୁମଡୁମାହା ଓ ନଗଡା କି ବୋଲି ପ୍ରଶ୍ନ ପଚାରିଥିଲେ । ସମାଜସେବୀ ଶୃତି ମହାପାତ୍ର, ମୟୁରଭଂଜ  ଜିଲ୍ଲାପାଳ ରାଜେଶ ପ୍ରଭାକର ପାଟିଲ, ଶିକ୍ଷା ସଚିବ ସୁଭାଷ ଖୁଂଟିଆ, ଲକ୍ଷ୍ମୀଧର ମିଶ୍ର, ବସନ୍ତ କର ପ୍ରମୁଖ ଯୋଗଦେଇ ଶେଷତମ ଲୋକଟି ପାଖରେ ଯୋଜନା ପହଂଚିବାର ମାର୍ଗ ସମ୍ପର୍କରେ ଉପସ୍ଥାପନା କରିଥିଲୋ

ବୁଧବାର ଅପରାହ୍ନ ଯାଏ ଏହି ସମ୍ମିଳନୀ ଚାଲୁ ରହିବ । ଉଦ୍‌ଯାପନୀ ଦିବସରେ ଅଂଶଗ୍ରହଣକାରୀ ମାନେ ଓଡିଶା ବିକାଶର ରୋଡ ମ୍ୟାପ ସରକାରଙ୍କ ଉଦ୍ଦେଶ୍ୟରେ ପ୍ରଦାନ କରିବେ ।

 

Leave a Reply

Your email address will not be published. Required fields are marked *

*